منك ما هي منك طب حراميها ... ولعب بيها وخبطها وشرب صافيها
گلنالك تحذر ما وراك الذيب ... داعيت الضواري وامنت بيها
يا مصدك الاوهام أن البخت حفاظ ... يا حظ يا بخت لو ترك سركيها
ثورة تمرغصت من بين حلگ الموت ... وبدمك خذتها شلون تنطيها
شفت شلون عثرت وانجفت على الگاع ... وتعلم فردها تراب رجليها
وحگك مو ملامة وتعداك اللوم ... بس جمرة عذابك تمشكلت بيها
يا سيد العفة ويا نزيه الروح ... ويا رمل الشجاعة على التواليها
يالملاگي الرصاص عيونك مورثات ... زلمة لغدرتك ما اظن زلم بيها
الزلم قول وتعب وانت الطركت ارقاب ... چان الموت حگ مفصل عليها
وچان الوطن يلهب والجموع تصيح ... أعدم، والخطورة اتساهلت بيها
ومن ضاقگت عليك انتفض شيب وشاب ... سيل وحزب عادل جان حاديها
غضبت شعب داس على راس الموت ... وشبت نار گبرة شلون تنطيها
شفت الكاظمية وشفت الكريمات ... وشفت الشاكرية وكل محاليها
وشفت الميزة ومذبحة باب الشيخ ... وعگود الكرد وشما حواليها
بغداد بأسرها شما حوت من ناس ... شالت رايتك وتريد راعيها
يا شاطر غلطت كلفانا ارواح ... والخلطة الجبيرة شلون تمحيها
يا غرت بياض بگصت التاريخ ... جسدت الرجولة بكل معانيها
لاگيت المنايا بهيبة الفرسان ... ما دوّرت حفرة وعَفّنِتْ بيها
يالگبرك صرح بقلوب كل الناس ... شلك بالگبور الرجل تاطيها
ليست هناك تعليقات:
إرسال تعليق